काठमाडौं । अख्तियार दुरुपयोग अनुसन्धान आयोगले भ्रष्टाचार नियन्त्रण, सुशासन प्रवर्द्धन तथा शान्ति–सुरक्षा कायम गर्न उल्लेखनीय योगदान पुर्याएको भन्दै नेपाल प्रहरीका महानिरीक्षक (आईजीपी) दानबहादुर कार्कीलाई विशेष सम्मानस्वरूप पुरस्कार प्रदान गरेको छ ।
सोमबार काठमाडौंमा आयोजित विशेष समारोहमा अख्तियारका प्रमुख आयुक्त प्रेमकुमार राईले आईजीपी कार्कीलाई सम्मान प्रदान गरेका हुन् । कार्यक्रममा सार्वजनिक सेवा प्रवाहमा पारदर्शिता, जवाफदेहिता र निष्ठालाई संस्थागत गर्दै प्रहरी संगठनलाई थप विश्वसनीय बनाउने दिशामा नेपाल प्रहरीले खेलेको भूमिकाको उच्च मूल्यांकन गरिएको थियो ।
अख्तियारका प्रमुख आयुक्त राईले प्रहरी संगठनभित्र सुशासन, अनुशासन र भ्रष्टाचारविरुद्धको शून्य सहनशीलताको नीति व्यवहारमा उतार्न आईजीपी कार्कीको नेतृत्व प्रभावकारी देखिएको उल्लेख गरे । उनले कानून कार्यान्वयन गर्ने निकाय र भ्रष्टाचार नियन्त्रण गर्ने संवैधानिक निकायबीचको सहकार्यले राज्य संयन्त्रप्रति जनविश्वास बढाउन महत्वपूर्ण भूमिका खेलेको बताए ।
सम्मान ग्रहणपछि प्रतिक्रिया दिँदै आईजीपी दानबहादुर कार्कीले उक्त सम्मानलाई व्यक्तिगत उपलब्धिभन्दा पनि सम्पूर्ण नेपाल प्रहरीको सामूहिक मेहनत, प्रतिबद्धता र व्यावसायिकताको कदरका रूपमा लिएको बताए । उनले यो सम्मानले नेपाल प्रहरीप्रति आमनागरिकको विश्वास अझ सुदृढ बनाएको उल्लेख गर्दै निष्ठा, पारदर्शिता र जवाफदेहितालाई संस्थागत गर्दै अघि बढ्न थप प्रेरणा मिलेको बताए ।
आईजीपी कार्कीले भ्रष्टाचार नियन्त्रण, सुशासन प्रवर्द्धन र शान्ति–सुरक्षा कायम गर्ने विषयमा नेपाल प्रहरी पूर्ण रूपमा प्रतिबद्ध रहेको स्पष्ट पारे । उनले प्रहरी संगठनलाई अझ व्यावसायिक, अनुशासित, उत्तरदायी र जनमुखी बनाउने लक्ष्यसहित अख्तियार दुरुपयोग अनुसन्धान आयोगसँग सहकार्य गर्दै अघि बढ्ने प्रतिबद्धता समेत व्यक्त गरे ।
कार्यक्रममा अख्तियार दुरुपयोग अनुसन्धान आयोगका उच्च पदाधिकारीहरू, विभिन्न सुरक्षा निकायका वरिष्ठ अधिकारीहरू, पूर्व प्रशासक तथा विशिष्ट व्यक्तिहरूको उल्लेखनीय उपस्थिति रहेको थियो । सहभागी वक्ताहरूले सुशासन र भ्रष्टाचार नियन्त्रणका लागि राज्यका सबै निकायबीच सहकार्य, समन्वय र पारदर्शिताको आवश्यकता औंल्याएका थिए ।
यस सम्मानलाई नेपाल प्रहरी संगठनभित्र सकारात्मक कार्यसंस्कृति प्रवर्द्धन, नेतृत्वप्रति भरोसा र सार्वजनिक संस्थाप्रति नागरिकको विश्वास अभिवृद्धि गर्ने महत्वपूर्ण कदमका रूपमा हेरिएको छ ।
प्रतिक्रिया
सम्बन्धित खवर
